– Dette er eit fullt fortent tap. Vi leverer ein svært svak kamp, seier trenar Anders Helsem Hoff etter 4. divisjonsoppgjeret mot Hovdebygda fredag kveld.

Han meiner opninga på kampen var katastrofal frå Bergsøy si side, og skildrar dei første femten minutta som særs dårlege.

På det tidspunktet hadde heimelaget allereie scoret to mål. Etter kvart fekk Bergsøy litt meir grep om spelet.

– Vi kjem oss noko inn i kampen og klarer å skape fleire moglegheiter. Likevel kjem vi aldri opp på det nivået vi veit vi kan halde, forklarar Hoff.

Tomas Matuszczyk stod for Bergsøy sitt einaste mål då han reduserte i det 16. minuttet. Dermed gjekk laga til pause med 2–1 til Hovdebygda.

I andre omgang klarte ikkje Bergsøy å snu utviklinga.

– Vi er langt frå der vi skal vere. Det blir for mange feilpasningar, og spelet vårt manglar tempo og rørsle. Vi skal eigentleg vere gode nok til å styre ein slik kamp mot Hovdebygda, så dette er vi svært skuffa over, seier Hoff.

Allereie torsdag ventar ny kamp mot Hødd 2 på Høddvoll, og då forventar Bergsøy-trenaren eit heilt anna uttrykk frå laget sitt.

– Eg reknar med at vi slår tilbake då. Eg forventar å sjå eit heilt anna Bergsøy enn det vi viste i kveld, avsluttar Hoff.